Teatro en Cabanas
  • Jueves, 04 Junio 2009

Entre os actos que se están a celebrar no Concello de Cabanas co gallo do fin das actividades culturais e deportivas celebradas durante o curso 2008-2009, este próximo venres tócalle a quenda ós rapaces que tomaron parte no curso de teatro, aproveitando ademais para conmemorar o Día da Natureza. 

Deste xeito, a partir das 17:30 horas, a Escola Laica de Cabanas acollerá a representación da obra teatral titulada “Tía Cortés” e na que os actores serán os nenos e nenas que durante todo o ano estiveron a participar na actividade de teatro. Posteriormente, as 18:00 horas, collerá o testemuño o grupo Caramuxo Teatro, que levará a cabo a representación da obra de títeres “Historia dunha semente” e que suporá o acto central da conmemoración do Día da Natureza. A entrada para participar en ambas actividades é gratuíta.

Obradoiros para mulleres
  • Jueves, 30 Abril 2009

Un total de catro obradoiros comporán a programación para o mes de maio planeada pola Concellería de Servizos Sociais do Concello de Cabanas en colaboración coa Oficina I+B de As Pontes. Trátase de obradoiros nos que proporcionar espazos de coñecemento e apoio mutuo e onde poder reflexionar e redescubrise a un mesmo. O persoal técnico de Igualdade da Oficina de As Pontes será o encargado de impartilos. O lugar onde se impartirán será no Antigo Concello e os destinatarios dos mesmos serán as mulleres de calquera idade de Cabanas. 

A primeira destas actividades terá lugar os días 4 e 5 de maio, en horario de 10 a 12 horas e tratarse dun “Obradoiro de Risa”, no que a través do xogo e da diversión aprenderase optimismo e sentido do humor, co obxectivo de acadar a relaxación a través da risa. Os días 11 e 12 de maio, de 10:00 a 12:30 horas terá lugar o “Obradoiro de Habilidades de Comunicación”, cuxo obxectivo será o de aprender a expresarse e falar en público así como negociar nos conflitos. Os días 18 e 19 de maio realizarase o “Obradoiro de Educación para a Saúde”, en horario de 10:00 a 12:30 horas, e con el buscarase dar a coñecer a coidar do propio corpo para así mellorar en calidade de vida. O último dos obradoiros será os días 25 e 26 de maio, tamén en horario de 10:00 a 12:30 horas. Co nome de “Obradoiro de Autoestima” buscarase aprender e coñecerse a un mesmo para así poder valorarse maís. 

Para poder acadar máis información sobre a oferta dos cursos así como apuntarse ós mesmos, poderán achegarse ós Servizos Sociais do Concello de Cabanas ou ben chamar ó teléfono 981 49 59 59.

I Certame Literario Concello de Cabanas
  • Miércoles, 15 Abril 2009

Ante a proximidade da celebración do Día das Letras Galegas, o Concello de Cabanas puxo en marcha o seu I Certame Literario de Narrativa e Poesía. Búscase con esta iniciativa promocionar a creación literaria, ó tempo de servir como estímulo positivo para facilitar unha mellora no eido da literatura e da poesía. No seguinte link poderán descargarse as bases deste certame.

I Certame Literario - Concello de Cabanas

Revisión podolóxica
  • Lunes, 06 Abril 2009

A través da súa concellería de Servizos Sociais, o Concello de Cabanas organiza unha actividade para o vindeiro día 8 de abril que consistirá nunha revisión podolóxica gratuíta, orientada ás persoas maiores do municipio. O lugar onde terá lugar está actividade será na Escola Laica, a partires das dez da mañá e a mesma será levada a cabo por un podólogo profesional. Enmárcase esta actividade dentro do programa de prevención levado a cabo pola concellería de Servizos Sociais, que comezou xa no curso anterior con revisións no C.E.I.P Eladia Mariño e que abre agora unha nova vía de desenrolo. Aquelas persoas interesadas en participar nesta actividade poden acadar máis información a través dos Servizos Sociais do Concello de Cabanas ou ben chamando ó 981 49 59 59.

Día da Árbore
  • Lunes, 30 Marzo 2009

Co gallo de celebrar o Día Internacional da Árbore, o Concello de Cabanas en colaboración co C.E.I.P. Eladia Mariño e co A.N.P.A O Castiñeiro levou a cabo unha plantación de árbores autóctonas na que colaboraron os nenos e nenas que acoden ó centro escolar cabanés. O pasado venres 27 de marzo, a partir das once e media da mañá desenvolveuse a actividade no parque do Areal. Ademais da plantación de doce especies da zona, un técnico forestal deu unha charla ós rapaces e respondeulles as súas dúbidas. Para finalizar, repartíronse entre todos pequenos carballos e fíxose a solta de vinte pombas mensaxeiras.


 

 

 

Nova programación de informática
  • Martes, 03 Marzo 2009

O Concello de Cabanas decidiu a organización de cursos agrupados en tres niveis diferentes segundo o grao de coñecemento dos interesados en participar. O Concello de Cabanas, a través da súa Aula de Informática, xa ten preparado o que será a programación de cursos de informática que se van a ofertar. Buscando como sempre o chegar ó máximo número posible de beneficiarios, sen que ninguén quede excluído 

Deste xeito, nun primeiro nivel para usuarios que se están a iniciar, ofértanse tres cursos. O primeiro deles titúlase precisamente “Primeiros pasos na informática” e o comezo do mesmo está previsto para o 22 de xullo. O segundo dos cursos, de nome “Introdución á informática e tecnoloxías da informática” comezarase o 4 de agosto e o terceiro curso “Uso de móbiles e cámaras dixitais” o 17 de agosto. 

Nun segundo nivel, para usuarios con coñecementos medios, ofertaranse seis cursos diferentes. O primeiro destes cursos dará comezo o 12 de maio, tratando sobre “Retoque fotográfico”. Do mesmo xeito ofreceranse outros cursos con temática variada, como o uso do procesador de textos en linux, o uso intelixente de internet ou sobre ferramentas de software libre. 

Por último, para usuarios cun nivel avanzado a oferta de cursos comezará xa o próximo 9 de marzo cun curso avanzado sobre retoque fotográfico. Tamén se ofrecerán cursos sobre a creación de blogs, deseño de páxinas web ou ensamblaxe e mantemento de PC’s. 

Para acadar máis información sobre os diferentes cursos, poden achegarse ó Concello de Cabanas ou ben chamar ó 981 49 59 59.

Comida de Carnaval
  • Lunes, 02 Febrero 2009

Un ano máis, os concellos de Cabanas e Pontedeume xuntan esforzos para levar a cabo unha nova Comida Intermunicipal de Carnaval. Trátase esta dunha actividade en conxunto entre os dous municipios e nos que se xuntan veciños dun e doutro lado para celebrar o Carnaval e desta forma aproveitar para estreitar lazos entre as dúas poboacións.

Nesta ocasión, a comida celebrarase o vindeiro 19 de febreiro, o xoves antes das festas de Carnaval, e terá lugar a partir das dúas e media da tarde, servíndose o tradicional cocido que nestas datas ocupa as mesas da maioría dos galegos. O prazo para poder inscribirse nesta comida rematará o día 16 de febreiro. Para acadar máis información, os interesados poderán dirixirse os Servizos Sociais dos Concellos de Cabanas, no teléfono 981 49 59 59 ou de Pontedeume, no teléfono 981 43 32 88.

Melloras nos Parques Infantís
  • Lunes, 02 Febrero 2009

Entre as diferentes obras que o Concello de Cabanas ten previsto realizar neste ano 2009, atopase a Primeira Fase para a Adecuación dos Parques Infantís ás normativas actuais. O Concello ten na actualidade diversos parques infantís nas diferentes parroquias e lugares, máis o deterioro dos elementos así como as novas normativas en materia de seguridade fan necesario unha renovación completa dos mesmos.

 

Deste xeito, aproveitando un Plan Especial da Deputación de A Coruña, o Concello de Cabanas pretende a adecuación de varios destes parques cun presuposto final que supera os 70.000 euros. Así, nesta primeira fase procederase á dotación de equipamento específico, tanto para actividades lúdico-deportivas en xeral, dirixidas ós nenos e nenas, así como da mellora dunha infraestrutura de uso público existente e que en conxunto servirán para mellorar a calidade de vida dos habitantes de Cabanas.

 

Os parques incluídos nesta fase serán os do Concello Vello, de Lavandeira, de Irís, de As Modias, de Laraxe e o do Areal. Nos traballos que se levarán a cabo está previsto o desmontaxe dos elementos que se atopan en mal estado, tanto polo seu uso continuado como por verse expostos ás inclemencias meteorolóxicas, a preparación do terreo para os novos equipamentos así como a dotación de sistemas de protección.

Páginas