Mensaje de error

User warning: The following module is missing from the file system: file_entity. For information about how to fix this, see the documentation page. in _drupal_trigger_error_with_delayed_logging() (line 1128 of /home/cabanas/www/includes/bootstrap.inc).

Inicio

Un Nadal Diferente
  • Miércoles, 19 Diciembre 2012

O programa “Un Nadal Diferente” pretende ser un espazo divertido e educativo de calidade para os rapaces e rapazas que favoreza a conciliación da vida persoal e laboral das súas familias no período vacacional do Nadal, fomentando a igualdade de xénero, así como a corresponsabilidade familiar. As actividades deste programa, financiado pola Deputación da Coruña e o Concello de Cabanas, levaranse a cabo entre os días 24 de decembro e 7 de xaneiro na Escola Laica, en horario de 9:30 a 13:30 horas. As prazas están limitadas a 25 sendo o prazo de inscrición os días 20 e 21 de decembro, cun custe de quince euros.

Entre os obxectivos que se perseguen con “Un Nadal Diferente” está ademais dos mencionados anteriormente o de posibilitar a conciliación da vida persoal, familiar e laboral das familias así como ofertar actividades creativas, lúdicas e atractivas de corte socioeducativo de calidade do mesmo xeito que fomentar o benestar e a mellora da calidade de vida das familias en xeral, promovendo a concienciación social e de promoción da igualdade en particular.

Ademais hai un descoñecemento xeral da existencia de celebracións noutras culturas, países e épocas e as súas características e as diferenzas que teñen coa que nos celebramos. Por ese motivo tamén se considera oportuno traballo e achegar de forma divertida e educativa o Nadal doutras épocas e culturas.

O que se pretende con cada un dos obradoiros que van compoñer a oferta deste programa é que os nenos e nenas coñezan, valoren e respecten, a través de xogos, dinámicas, películas, testemuñas e creacións artísticas, as festas, tradicións, comidas e adornos típicos do Nadal dos diferentes lugares do mundo e noutras épocas pasadas.

Actividades deportivas en decembro
  • Lunes, 17 Diciembre 2012

En colaboración co club KDM, a Concellería de Cultura e Deportes de Cabanas ten previsto para as próximas datas diferentes actividades deportivas, co obxectivo todas elas de facilitar alternativas distintas ós veciños e veciñas do municipio, aproveitando a boa acollida que tiveron recentemente as rutas de sendeirismo e kayak. Un curso de iniciación e perfeccionamento en kayak e tres novas rutas compoñerán a oferta durante o mes de decembro en Cabanas.

O curso de iniciación e perfeccionamento levarase a cabo na Praia da Madalena, tendo como base a caseta de salvamento e socorrismo. Alí será cando o día 22 de decembro, as 10:30 horas terá lugar a presentación do mesmo, desenrolándose posteriormente os días 24,26,27,28 e 29 de decembro e 2,3 e 4 de xaneiro en horario de 10:30 a 12:30 horas. O obxectivo que se buscará con este curso é fundamentalmente a aprendizaxe no manexo do kayak e da pala, material básico para a práctica deste deporte ademais de transmitir os coñecementos necesarios para poder realizar con seguridade as saídas pola ría empregando material do club.

En canto as rutas que están programadas, a primeira delas terá lugar o próximo sábado 22 de decembro e será unha ruta en kayak que saíndo da Praia da Madalena percorrerá as praias de Chamoso, Río Castro, Río Sandeo, etc. A saída será ás 11:30 horas e terá unha duración aproximada de dúas horas. Como requisito imprescindible as persoas que acudan deberán saber nadar.

O domingo 23 de decembro levarase a cabo a segunda das rutas programadas, neste caso de sendeirismo. Nesta ocasión será polas Fragas do Eume tendo a saída prevista ás 10:30 horas dende a caseta de socorrismo da Praia da Madalena. Posteriormente realizarase outra saída, o 30 de decembro, recorrendo os sendeiros que, bordeando a ría, discorren entre a Praia da Madalena e o pobo de Redes. A saída tamén será dende a caseta de socorrismo as 10:30. A duración prevista das dúas rutas será de dúas horas e media.

Xantar de Nadal
  • Viernes, 14 Diciembre 2012

Fomentar e potenciar as relacións entre as diferentes parroquias así como mellorar os lazos entre as diferentes xeracións. Estes son os obxectivos cos que se levará a cabo o próximo 21 de decembro un xantar organizado polo Concello de Cabanas a través da súa concellería de Servizos Sociais. A hora deste xantar será ás 14:30 horas e un transporte gratuíto recollerá a todos aqueles veciños e veciñas que así o necesiten para acudir. Ó final do xantar, que contará con animación musical, procederase ó sorteo de dúas estanzas para dúas persoas cada unha en diferentes spa de España. O prazo de inscrición rematará o día 19 de decembro. Aquelas persoas interesadas en obter máis información poderán poñerse en contacto cos Servizos Sociais do Concello de Cabanas ou ben chamando ó 981 49 59 59.

Magosto 2012
  • Jueves, 15 Noviembre 2012

O Concello de Cabanas celebrará mañá venres, 16 de novembro, o seu tradicional Magosto, organizado pola Concellería de Cultura e Deporte en colaboración coa S.C.R.D. O Loureiro e a Asociación de Mulleres Cabanas Rural. Seguindo o novo costume que se ven levando a cabo coas diferentes actividades que se organizan dende o Concello, escolleuse para a celebración deste Magosto o Local Social de Lavandeira, rotando desta forma por todas as parroquias do municipio os actos festivos municipais.

Nesta ocasión os actos do Magosto darán comezo as 19:30 horas. Entre os asistentes repartiranse racións de castañas asadas e arenques, xunto con viño romano e queimada por tan só tres euros. Os menores de doce anos poderán participar de forma gratuíta. O evento estará animado musicalmente polo Dúo Fantasía.

Nenos e Nenas Iguais
  • Miércoles, 31 Octubre 2012

Favorecer entre os máis pequenos actitudes igualitarias e introducir dende as ideades máis temperás ideas que desboten os estereotipos de xénero. Este é o obxectivo da nova iniciativa que se pon en marcha dende os Servizos Sociais do Concello de Cabanas. A partir do próximo luns, 5 de novembro, e ata o 23 do mesmo mes, o alumnado do CEIP Eladia Mariño será o destinatario do programa de coeducación “Nenos e Nenas iguais” que se atopa financiado pola Dirección Xeral de Igualdade da Xunta de Galicia.

A iniciativa contará con dúas partes secuenciais, nas que por unha banda comezarase cunha actividade de reflexión e análise sobre as diferenzas de xénero para a continuación pasar a acción creando cos participantes contos propios, así como a realización física de personaxes para a representación dos mesmos mediante un obradoiro de construción de monicreques. Estas actividades desenvolveranse en cada curso escolar de Educación Infantil e Educación Primaria en sesións de dúas horas de duración.

Día da Bicicleta
  • Miércoles, 24 Octubre 2012

Un ano máis o Concello de Cabanas a través da súa concellería de Deportes e Cultura ten previsto levar a cabo unha marcha cicloturista. O evento terá lugar este próximo domingo, 28 de outubro, sendo a hora de saída ás 11:00 da mañá dende o Piñeiral da Madalena. A actividade é gratuíta, estando aberta a participantes de calquera idade.

Os nenos e nenas menores de once anos poderán percorrer un circuíto que se fará no antigo campo de fútbol da Madalena. Os maiores participarán nun circuíto cicloturista cunha duración aproximada dunha hora polas parroquias de Cabanas e Porto. En ambas actividades é obrigatorio o uso de casco. Ó remate da actividade procederase a entrega dun avituallamento ós participantes así como dunha camiseta e posteriormente levarase a cabo un sorteo de regalos entre todos.

Todos aqueles que estivesen interesados en participar neste Día da Bicicleta ou recadar máis información poderano facer dirixíndose ó departamento de cultura e deportes do Concello de Cabanas ou chamando ó 981 49 59 59.

Reunións veciñais para os presupostos de 2013
  • Miércoles, 26 Septiembre 2012

Como ven sendo habitual nos últimos anos, o Concello de Cabanas pensa realizar unha serie de reunións nos diferentes locais sociais que existen no municipio. Nestas xuntanzas, o consistorio municipal buscará explicar ós veciños e veciñas de Cabanas como se pretenden preparar os presupostos do próximo ano 2013 e do mesmo xeito tamén se escoitaran as suxestións e as preguntas que os asistentes desexen realizar, co obxectivo de preparar  os mellores presupostos posibles para o funcionamento do Concello, tendo sempre en conta as necesidades de cada parroquia.

As reunións faranse nos diferentes locais sociais que hai no concello, para deste xeito poder favorecer que asista a maior parte dos veciños e veciñas de Cabanas. A hora das reunións será sempre ás 20:30 horas. O calendario previsto será o seguinte:

-    27 de setembro: Local Social do S.C.R.D. San Mamede de Laraxe
-    01 de outubro: Local Social do C.C.R.D. San Martiño de Porto
-    02 de outubro: Local Social de Lavandeira
-    03 de outubro: Concello de Cabanas
-    26 de outubro: Local Social de Santa Cruz

Páginas